Wayak lampung bismillah pagun lapah

Biamillah hamu kidah
Kik temon pandai ngaji
Ya allah repa ulah
Kik nasip gegoh reji

Ngebedak bulan wewah
Sayuk diramut pagi
Kemarau labung tengah
Mak panas tugok dibi

Niti patoh di tengah
Sakik malang ni dikhi
Laju nyak karom menah
Mundor sayuk di bumi

Kumbang mak jadi buah
Reno pai sakiman ni
Halok do halok kidah
Kumbang cadang di ruwi

Kapan do kapan kidah
Gegoh di kanan kiri
Lapahan santor mudah
Betik helau seunyinni

Mak nungga ninggal bitah
Huwok api kelagi
Jawoh anjak ginalah
Lelakun labung bumi

Kalau iman mak rubah
Tetop ya nekon dikhi
Bismillah pagun lapah
Nyirang kelom ni bingi

Senajin mawat mudah
Nasip sai nimpa dikhi
Tagih mundor selangkah
Walaupak lamon ruwi

Tikecat pai sejadah
Laju ngangkat usolli
Puput baca patihah
Luwar heluh kutahili

Ya allah tulung kidah
Hambamu dilom bumi
Keni asal bulangkah
Di bumi pana sinji

Sukorku pagun mundah
Ikhlas api gelagi
Mak niku sapa kidah
Kebak kedau ni dikhi

(Kilu angkon rik andan)

Share :