Kumpulan Wayak Lampung
(Sasakh)
Liwat khani kebian
Magekhib pai belalu
Tebitta nyak way kanan
Disan pok ni jenganmu
Khisok jadi pikikhan
Kak disan wat tanyaku
Macom di pertanyaan
Nyin kicik kita laju
Khisok putuk di jalan
Jajama kita nunggu
Kak kapan makhik kapan
Khenno juga hamu
Nyak tukhuk nyimak nihan
Ku simpon di angonku
Haga cawa nyak sungkan
Ngucak isi hatiku
Nyak khabai di hakhapan
Khugui khasa hatiku
Niku kumbang puandan
Sikop betik budimu
Bedu'a nyak di tuhan
Ku pikko lom sujudku
Kalau wi kemujukhan
Puandan nyak diniku
By: Azwar Halim Putra Barnas
(Gerhana)
Terjadi ni gerhana
Tepat ni bingi sinji
Gelakh ni penomena
Kuasa ni ilahi
Kipak ya penomena
Wajib ya ti imani
Mak salah ni kham bedu'a
Pakhkilu di ilahi
Mingokh dilom bekhita
Lamon nihan tidengi
Gerhana sunyin kabakhna
Hiruk pai shinggo ni
Khamik hulun segaga
Luakh nonton motoni
Ajo do momen langka
Pekhellu ti abadi
Ko
haku makin ana
Acak ingok ilahi
Sembahyang kham jajama
Di masjid di lambanni
Kalau mejawoh bala
Mekhedik di khejeki
Sekian pai cekhita
Wassalam penutup ni
By: Azwar Halim Putra Barnas & Pulampas Edi
Lain ki mak magindam
Way di bulung talos
Lain ki nyak mak tiram
Ki sinji payah nedos
Indah ni way malaya
Merubok campor lawok
Haga nihan nyak tungga
Kidang ni makung dapok
Api say suning -suning
Uwah mandira mesak
Adu saka nyk gering
Kidang mak ku ucak-ucak
By : Dho Son Waynarta
Handuat ni ram tungga
Kuti kumbang sai merum
Kusambut culuk rua
Bulayar namping barat
Aga Nuju pulau lagundi
Lapah ni sinji surat
Ngantak ko isi ni hati
Mit duwai rani trai
Ngilek ko batu liyut
Ki wayak ku adu sampai
Baca do daleh ngimut
Serok pelok di hatok
Dibah ni limau kunci
Kipak kuti masurok
Nyak harap kilu bidi
Kuteteh ku dipereh
Ditinder burung punai
Dang ram balin pileh
Kilu angkon muari
Kejejek muneh kaci
Menok kercici bunyanyi
Taru antak ija pai
Ti sambung jmoh bingi
By : wira krui
Asing wewah nih bulan
Mak liyu matakhani
Asing redokh nih khasan
Mak liyu tanda jadi
By : anitafaryadi
Mawek ku buang jala dek
Ki mak iwa nich lamon
Mawek ku buka cawa dek
Ki mak cawa sai temon
Hanipi tengah bingi
Minjak di guyang hiwang
Dang lagi dibabiti
Kantu angonmu cadang
Kantu angonmu cadang
Sai khadu kodo khadu
Ibakhat kinjuk tali
Nyak nyikhok niku nattang
Nyak nyikhok niku natang
Kapan haga jadini
Niku wat kundang sumang
Dang lagi tibabiti
By : Jumaedi Said Said
Kusesat nyipang jimat
Mati tulahan payu
Nyansat nyak mak selamat
Asal pujama niku
By : Rohim Isolatir
Sapa liwat kusimbat
Penyanaku ya niku
Kusangsat kikhpak melarat
Ulih haga nyenangko niku
By : Azhar
Post a Comment for "Kumpulan Wayak Lampung"